27.06.2012

ინტერვიუ ილია კოკაიასთან

ევროტურნირების საკვალიფიკაციო ეტაპების წილისყრის შემდეგ აზერბაიჯანულმა ვებგვერდმა azerisport.com-მა საფეხბურთო კლუბ "ზესტაფონის" პრეზიდენტთან, ილია კოკაიასთან ინტერვიუ გამოაქვეყნა.

ქართული კლუბის მფლობელს კითხვები ჩემპიონთა ლიგის მეორე საკვალიფიკაციო ეტაპზე "ზესტაფონისა" და ბაქოს "ნეფთჩის" მომავალ დაპირისპირებასთან დაკავშირებით დაუსვეს.

- წილისყრამ ჩემპიონთა ლიგის მეორე საკვალიფიკაციო ეტაპზე ბაქოს "ნეფთჩისთან" დაგაპირისპირათ...
- ბრწყინვალეა! ბაქო ახლოსაა - ჩამოვალთ, ვითამაშებთ და შინ დავბრუნდებით. არავითარი ხანგრძლივი ფრენა, გრაფიკი და სავიზო პრობლემა არ შეგვაწუხებს. ასე რომ, თან ვითამაშებთ და თან "გავისეირნებთ"!

- ანუ აზერბაიჯანის ჩემპიონთან დაპირისპირებამ გაგახარათ?
- ჩვენთვის მეტოქე გუნდების სახელები არაფერს ნიშნავს. ამ ეტაპზე სუსტი გუნდები ისედაც არ არის.

- რას იტყვით "ნეფთჩიზე"?
- ამ კლუბზე ინფორმაციას არ ვფლობ. თუმცა ვიცი, რომ "ზესტაფონისგან" განსხვავებით, საბჭოთა კავშირის დროს "ნეფთჩი" სსრკ-ის ჩემპიონატში გამოდიოდა.

- გასულ სეზონში თქვენი გუნდი ახლოს იყო ევროპის ლიგის ჯგუფურ ეტაპზე მოხვედრასთან. ამჯერად "ნეფთჩისთან" "ზესტაფონის" შანსებს როგორ აფასებთ?
- შანსებს ყოველთვის ჩვენთვის სასარგებლოდ ვაფასებთ. შესაბამისად, "ზესტაფონი" ამ წყვილში ფავორიტია! ეს წილისყრამაც აჩვენა - ჩვენ ხომ განთესილთა კალათაში ვიყავით.

- ის, რომ პირველ მატჩს ბაქოში გამართავთ, თქვენთვის მომგებიანია?
- ამ შემთხვევაში დიდ განსხვავებას ვერ ვხედავ. ერთი ეგაა, "ნეფთჩის" მთავარი მწვრთნელის სიტყვები არ მომეწონა, რომელმაც თქვა, რომ ხელოვნურსაფარიან მოედანზე მიგვიღებენ.

რატომ ხელოვნური საფარი - ჩემთვის გაუგებარია. ის ხომ ცუდია არამხოლოდ ჩვენთვის, არამედ საერთოდ ფეხბურთისთვის.

წარმომიდგენია, რა იქნება სინთეტიკაზე 40-გრადუსიან სიცხეში თამაში.

- თქვენს გუნდს მიზნად რა დაუსახეთ?
- გუნდის შემადგენლობის გაძლიერებას ვაპირებთ, ჩვენ მიზანი კი - ჩემპიონთა ლიგის მოგებაა!