28.03.2015

ამხანაგური მატჩი საჩხერელებთან

მიმდინარე წლის 28 მარტს საფეხბურთო კლუბმა ”ზესტაფონის” პირველმა გუნდმა ამხანაგური მატჩი ჩაატარა - ზესტაფონელთა თბილისის საწვრთნელ ბაზაზე გამართულ საკონტროლო შეხვედრაში მასპინძლები მარგვეთის მხარის კიდევ ერთ წარმომადგენელს, საჩხერის საფეხბურთო კლუბ ”ჩიხურას” დაუპირისპირდნენ.

იმერული გუნდის დამრიგებელმა გიორგი მიქაძემ მოედანზე შემდეგი შემადგენლობა გაიყვანა: ჯალაღონია (კუპატაძე, 46), მთივლიშვილი (მჭედლიშვილი, 46 (ვაჭარაძე, 85)), რობაქიძე, ლომაია (მოსიძე, 83), ჩიხრაძე (გაგოშიძე, 46), რაჟამაშვილი (პ. ხორგუაშვილი, 65), ნემსაძე (ვასაძე, 46), სიხარულია (გაჩეჩილაძე, 46), ხაბელაშვილი (ილურიძე, 46), მესხი (სამუშია, 46), ჯერემია (კანდელაკი, 70).

უმძიმეს ფინანსურ მდგომარეობაში მყოფმა ზესტაფონელებმა, პრობლემების მიუხედავად, წინასწარ დაგეგმილი მზადების პროცესი მაინც არ ჩაშალეს და დღევანდელ სპარინგს სრული პასუხისმგებლობით მოეკიდნენ - ანგარიში ტაიმის მიწურულს, 34-ე წუთზე გაიხსნა - ივანე ხაბელაშვილის ზუსტი გადაცემის შემდეგ "ჩიხურას" კარში გოლი ჯონი ჯერემიამ გაიტანა.

მეორე ტაიმის შუაწელს (70-ე წუთი), ამჯერად უკვე გიორგი ილურიძის კარგი გადაცემის შემდეგჯონი ჯერემიამ თავის გუნდი უკვე ორბურთიანი უპირატესობით დააწინაურა. მართალია, საჩხერელმა არჩილ ბაჯელიძემ 76-ე წუთზე გატანილი პენალტით ანგარიშში სხვაობა მინიმუმამდე შეამცირა, თუმცა საბოლოოდ, დღევანდელი დაპირისპირება მაინც "ზესტაფონის" გამარჯვებით 2-1 დასრულდა.